Hlăm mmông tŭ drông, Khua lăn čar Võ Văn Thưởng yap yuôm bhăn Pô bi ala hlăm wưng êgao mâo leh lu mmông mă bruă hŏng dŭm anôk bruă djŏ tuôm Việt Nam, nao čuă lu alŭ wăl knăm mtrŭt mđĭ klei bi mguôp 2 ala čar ƀrư̆ hruê ƀrư̆ êlam leh anăn tŭ dưn. Pô bi ala mñă klă, Mi srăng lŏ dơ̆ng bi mguôp kjăp hŏng Việt Nam hlăm bruă mgaih msir boh jhat mơ̆ng klei bi blah, mâo wăt bruă mgaih msir klei hmăi mơ̆ng drao ruă diosin, duah mă boh ƀom, boh mtuh leh anăn tui duah mnuih luč leh klei bi blah.

Čiăng lŏ bi êlam hĭn klei mjĕ giăm Việt Nam – Mi hlăm wưng kơ anăp, Khua lăn čar mñă kơ 2 tĭng mđĭ hĭn bruă bi trông êpul, bi tuôm gưl dlông leh anăn dŭm gưl, mtrŭt mđĭ hĭn dŭm hdră êlan, klei bi mguôp 2 tĭng hlăm djăp mta bruă, ba wĭt boh tŭ dưn klă klơ̆ng kơ 2 ala čar, mbĭt anăn đru mguôp kơ klei êđăp ênang, hơĭt kjăp, bi mguôp leh anăn mđĭ kyar ti alŭ wăl wăt kơ tar rŏng lăn.