Khua lăn čar Võ Văn Thưởng mñă kơ khua kiă kriê čar Fukuoka Hattori Seitaro mtrŭt mđĭ klei mjĕ mjuk mnuih ƀuôn sang Việt Nam – Japon leh anăn plah wah Hà Nội hŏng čar Fukuoka, boh nik jing bruă hiu čhưn ênguê wưng mdei mơ̆ng phung hđeh sang hră Japon hriê Việt Nam leh anăn phung hđeh sang hră, phung êdam êra Việt Nam nao čuă Japon, hluê ngă đru mkŏ mjing kjăp tur knơ̆ng klei mjĕ giăm 2 lăn čar kơ êdei anăp. Êngao kơnăn, dua tĭng čiăng đru kơ dŭm knơ̆ng bruă mơ̆ng Japon leh anăn knơ̆ng bruă Fukuoka lŏ dơ̆ng mđĭ hĭn klei duh bi liê ti Việt Nam, bi mguôp hŏng dŭm knơ̆ng bruă Việt Nam mđĭ kyar klei duh bi liê, mnia mblei, bi mguôp hlăm dŭm mta bruă dua tĭng mâo klei găl.

Čar Fukuoka leh anăn dŭm alŭ wăl mkăn bi mguôp hŏng Việt Nam mtô mjuăt mnuih mă bruă hnơ̆ng tŭ jăk… Khua kiă kriê čar Fukuoka bi êdah klei hmăng hmưi mtrŭt mđĭ klei bi mguôp, mjĕ mjuk hlăm lu mta bruă mdê mdê plah wah Fukuoka leh anăn Hà Nội leh anăn hmăng hmưi mâo klei sa ai mơ̆ng Khua lăn čar Võ Văn Thưởng.