Khua lăn čar bi mklă, Việt Nam êlâo êdei jing sa, dlăng myuôm klei bi hgŭm knhuah gru jăk siam hŏng Campuchia; hơ̆k mơak tơdah klei bi hgŭm dua ala čar ƀrư̆ hruê đĭ kyar klă sĭt leh anăn êlam. Khua lăn čar Võ Văn Thưởng mñă klă, Việt Nam hdơr nanao klei đru bŏ hŏng klei khăp mơ̆ng yang ƀuôn Campuchia hlăm klei bi blah răng mgang čar kwar êlâo dih ăt msĕ mơh hlăm klei mkŏ mjing leh anăn mđĭ kyar lăn čar  hruê anei.

Hŏng klei bi mguôp kơ lăn ala, dhar kreh, yang ƀuôn dua ala čar bi hgŭm hrăm mbĭt bi kdơ̆ng hŏng phung roh, hgao klei dleh dlan leh anăn ară anei hrăm mbĭt bi hgŭm mđĭ kyar lăn čar. Khua lăn čar bi êdah klei mơak ƀuh phung khua gĭt gai Campuchia pioh klei khăp jăk siam kơ Việt Nam, čang hmăng lŏ čuê dŭm ênuk gĭt gai nao êlâo, bi êlam hĭn klei bi hgŭm knhuah gru Việt Nam-Campuchia.