Blŭ hrăm ti knăm bi tuôm, Khua knơ̆ng kriê dlăng klei đăo Khop Giuse Nguyễn Chí Linh, Khua knơ̆ng kriê dlăng klei đăo Khop ti Huế lač jăk lehanăn bi êdah klei m’ak dưi drông Khua lăn čar lehanăn Êpul hriê čhưn ti Knơ̆ng kriê dlăng klei đăo Khop Huế, h’êč hmưi hruê Noel truh kơ jih jang mnuih hluê đăo ti Huế.

Khua knơ̆ng kriê dlăng klei đăo Khop Giuse Nguyễn Chí Linh bi mni dŭm boh tŭ jăk siam mơ̆ng dŭm gưl hiu čhưn ti ala tač êngao mơ̆ng Khua lăn čar Võ Văn Thưởng hlăm thŭn 2023, bi ala Knŭk kna Việt Nam nao bi tuôm, mă bruă hŏng phung khua kiă kriê lu ala čar pprŏng, đru mđĭ k’hưm Việt Nam hlm wăl anôk tar rŏng lăn.

“Hŏng mnuih đăo Khop Việt Nam, gưl nao čhưn ti Vatican lehanăn bi tuôm hŏng Đức Giáo hoàng Francis mơ̆ng Khua lăn čar Võ Văn Thưởng jing sa klei bi êdah jăk siam. Boh nik, mnuih đăo Khop ti Huế leh mâo gưl nao čhưn anei ăt m’ak mơh kyua diñu mĭn sa hruê amâo kbưi ôh diñu srăng dưi bi tuôm hŏng Đức Giáo hoàng Francis ti krĭng lăn myang La Vang. Hŏng kâo pô, êngao kơ klei m’ak anei, kâo bi mni êdi kơ klei bi mjĕ hgŭm bruă mơ̆ng dŭm tĭng djŏ tuôm hlăm ala ƀuôn lehanăn mnuih ƀuôn sang hluê đăo ƀrư̆ hruê ƀrư̆ h’uh mđao, jĕ giăm lehanăn khăp čiăng”

Hơ̆k m’ak hlăk dưi nao čhưn ti knơ̆ng kriê dlăng klei đăo Khop Huế hlăm ai êwa Noel dôk truh giăm. Khua lăn čar Võ Văn Thưởng m’ĭt asăp h’êč hmưi jăk siam truh kơ phung khua Đảng, Knŭk kna truh kơ Khua knơ̆ng kriê dlăng klei đăo Khop Giuse Nguyễn Chí Linh, Khua knơ̆ng kriê dlăng klei đăo Huế, phung per, phung hluê đăo lehanăn mnuih hluê đăo Khop ti Huế sa yan Noel êđăp ênang, h’uh mđao, sa thŭn mrâo jăk yâo.

Hưn mthâo kơ boh klei ala čar, Khua lăn čar brei thâo, thŭn 2023 ala čar drei mâo leh dŭm boh tŭ dưn mâo tar rŏng lăn bi mni, hlăm anăn mâo klei đru mguôp yuôm bhăn mơ̆ng êpul êya phung đăo Khop kluôm ala. Hŏng hdră êlan “Hdĭp jăk yâo hŏng djuê ana čiăng ba wĭt klei hơ̆k m’ak kơ ƀuôn sang”, mnuih đăo Khop sĭt êmĭt nao hgŭm hlăm dŭm hdră bi ktưn mâo Anôk bruă Mặt trận Việt Nam lehanăn dŭm êpul bruă mtrŭt mjhar, êdah kdlưn jing hdră đru kơ yang ƀuôn, đru kơ mnuih knap mñai, hdră mdrao mgŭn, mtô bi hriăm, bŏ hŏng klei khăp, mđing truh kơ mnuih ƀuôn sang, boh nik mnuih ênưih kpĕ êka msĕ si phung hđeh ƀun, amâo anôk jưh knang, mnuih khua thŭn, mnuih ruă kjham, mnuih djŏ HIV/AIDS...  

Khua lăn čar Võ Văn Thưởng bi mklă leh Hră jak iêu Đức Giáo hoàng Francis hriê čhưn ti Việt Nam, čang hmăng êpul êya mnuih đăo Khop Việt Nam bi hgŭm hŏng dŭm anôk bruă Knŭk kna hnưm mâo klei găl dưi drông Đức Giáo hoàng hriê čhưn.

“Kâo hdơr hlăm Hră m’ĭt mơ̆ng Đức Giáo Hoàng Francis kơ êpul êya mnuih đăo Khop Việt Nam leh kâo mâo gưl nao čhưn ti Sang yang, bi tuôm hŏng Đức Giáo Hoàng, mâo sa klei lač, klei khăp kơ Khua yang lehanăn khăp kơ anak mnuih jing dua nah mơ̆ng sa pŏk prăk. Lehanăn kâo ăt hdơr hlăm Hdruôm hră Klei Aê Diê blŭ mâo klei čih lač, mă bruă kơ ƀuôn sang pô ăt jing sa hdră mă bruă kơ Khua yang mơh. Kâo ƀuh mnuih đăo Khop mơ̆ng Knơ̆ng kriê dlăng klei đăo Khop Huê wưng êgao hluê ngă jăk bruă klam jing khăp kơ ƀuôn sang, khăp kơ Khua yang, mơ̆ng anăn đru mtrŭt mđĭ kyar bruă duh mkra – ala ƀuôn mơ̆ng krĭng wăl, ala čar, đru kơ klei hdĭp mnuih ƀuôn sang ƀrư̆ hruê ƀrư̆ đĭ jăk hĭn”.

Khua lăn čar Võ Văn Thưởng lač klă, ti Klei bi kƀĭn tal 8, Anôk kriê dlăng gưl dlông ba mdah leh Hdră mtrŭn kơ bruă lŏ dơ̆ng mđĭ lar knhuah gru, ai ktang bi hgŭm mguôp jih jang djuê ana, mkŏ mkra ala čar đĭ kyar jăk siam. Hdră mtrŭn mñă klă, klei hgŭm mguôp jih jang djuê ana jing knhuah gru yuôm bhăn mơ̆ng djuê ana Việt Nam, jing hdră êlan phŭn yuôm bhăn mơ̆ng Đảng, jing phŭn ai ktang mơ̆ng djuê ana. Khua lăn čar lač, čiăng dưi mâo snăn brei mâo klei hgŭm mguôp hlăm mnuih ƀuôn sang, bi hgŭm plah wah mnuih hluê đăo lehanăn mnuih amâo hluê, plah wah klei đăo anei hŏng klei đăo mkăn, plah wah mnuih Việt Nam hlăm ala čar lehanăn ti ala tač êngao. Hluê hŏng ai tiê anăn, Khua lăn čar čang hmăng, hŏng bruă klam jing Khua knơ̆ng kriê dlăng klei đăo Khop Huế Giuse Nguyễn Chí Linh srăng ktrâo lač, mđĭ ai mnuih hluê đăo Khop ti Huế mđĭ lar knhuah gru hdĭp jăk, đăo djŏ, Khăp kơ Khua yang lehanăn khăp kơ mnuih ƀuôn sang čiăng grăp hruê lŏ mao lu bruă ngă jăk siam, hrăm mbĭt mkŏ mkra ƀuôn sang ƀrư̆ hruê ƀrư̆ đĭ kyar sah mdrŏng lehanăn yâo m'ak”./.