Hlăm dŭm mta bruă mơ̆ng Hruê kăm gưl dlông APEC 2023, Khua lăn čar Võ Văn Thưởng srăng mbĭt hŏng phung khua gĭt gai mơ̆ng dŭm anôk bruă duh mkra APEC bi trông kơ dŭm boh klei mâo boh tŭ yuôm bhăn hŏng bruă duh mkra tar rŏng lăn leh anăn hlăm alŭ wăl, bi êdah dŭm hdră tă bi mguôp kơ klei mnia mblei, duh bi liê, klei kreh knhâo mrâo mrang, mlih mrâo hŏng klei mbruă leh anăn lu mta bruă mkăn.

Việt Nam srăng mbĭt hŏng phung hgŭm mtrŭt mđĭ klei blŭ hrăm, mkŏ mjing, bruă klam, bi myuôm hdră êlan lu tĭng, hriăm mbĭt bi mguôp, ngă bruă kyua klei đĭ kyar kjăp leh anăn klei mdrŏng sah hlăm alŭ wăl. Khua lăn čar Võ Văn Thưởng srăng nao hgŭm leh anăn blŭ hlăm klei kƀĭn trông gưl dlông Knơ̆ng bruă, nao hgŭm hlăm dŭm klei blŭ hrăm plah wah phung khua gĭt gai dŭm anôk bruă duh mkra APEC hŏng ƀĭng hgŭm, phung tuê, nao hlăm klei kƀĭn trông gưl dlông Hdră êlan bruă duh mkra krĭng ksĭ India – Pacific.