Leh hmư̆ phung bi ala hưn mdah hlăm mmông mă bruă, Khua lăn čar yap yuôm bhăn kyua čar dưi rŭ mjing 22 knơ̆ng kdơ̆ng êa mâo hnơ̆ng 520 êklăk m3 čiăng rơ̆ng kơ êa jua yua grăp hruê, yua hlăm klei mkra mjing, jing anôk rông hdang mjeh prŏng hlăm kluôm ala. Hnơ̆ng phung tuê hiu čhưn ênguê nao ti čar ƀrư̆ hruê ƀrư̆ đĭ. Hlăm bruă dhar kreh – yang ƀuôn dưi uêñ mĭn. Ktrâo klă dŭm mta phŭn hlăm klei đĭ kyar mơ̆ng Ninh Thuận, Khua lăn čar Võ Văn Thưởng mñă klă, Bruă Đảng čar, bruă sang čư êa leh anăn mnuih ƀuôn sang hlăm čar lŏ dơ̆ng hluê ngă hdră mtrŭn klei kƀĭn bruă Đảng dŭm gưl, hŏng klei mĭn kdlưn hĭn, hdră tă kơ hdră êlan, mkŏ mjing boh kdrŭt mrâo čiăng mtrŭt mđĭ bruă duh mkra – ala ƀuôn hmar leh anăn kjăp.

Khua lăn čar ăt mtă kơ čar lŏ dơ̆ng bi râo klei hmăng hmưi kpưn đĭ, ai tiê bi mguôp, čŏng pô, ai ktang mơ̆ng lam, knhuah gru hƀuê ênuk, dhar kreh, anak mnuih Ninh Thuận, mkŏ mjing tur knơ̆ng dhar kreh anak mnuih Ninh Thuận.

Mmăt hruê 15/6, Khua lăn čar nao hgŭm leh hlăm knăm Tŭ mă hră čih yap mơ̆ng UNESCO hŏng bruă mkra mjing mmơ̆ng mmuôn čuh hŏng hlăn mơ̆ng mnuih Chăm hlăm hră anăn mnơ̆ng kriê pioh dhar kreh čiăng răng mgang mjêč leh anăn kčưm pŏk knăm mơak Nho - Vang Ninh Thuận thŭn 2023.