Aguah mbruê 5/7, Khua lăn čar Võ Văn Thưởng mă bruă hŏng Phŭn bruă kahan ksiêm, Sang phat kđi yang ƀuôn gưl dlông, Dhar bruă phat mkra gưl dlông, adŭ bruă Khua lăn čar, Êpul kiă kriê bruă knuă gưl dlông leh anăn Dhar bruă hdră bhiăn mơ̆ng Bruă kƀĭn ala čiăng bi klă bruă mgaih msir hră mơar klei bi kmhal hŏng klei djiê leh anăn ngă klei bi kmhal hŏng klei mdjiê. Hlăm wưng êgao, dŭm anôk bruă djŏ tuôm mơ̆ng gưl dlông truh kơ alŭ wăl mâo leh klei bi mguôp kjăp, ksiêm dlăng, mgaih msir dŭm hră mơar klei bi kmhal bi mdjiê, kriê dlăng klei mă krư̆ leh anăn ngă klei bi kmhal bi mdjiê djŏ hŏng klei čuăn hlăm klei bhiăn ala čar.

Ƀiădah, bruă anei ăt dôk mâo klei êdu kƀah, dleh kpăk, ka djăp ênŭm hnơ̆ng čoh čuăn hŏng boh sĭt. Khua lăn čar Võ Văn Thưởng mtă, hlăm wưng kơ anăp, dŭm anôk bruă lŏ dơ̆ng hluê ngă ênŭm, djŏ hŏng hdră bhiăn dŭm bruă klam, klei dưi pô hluê si klei čuăn hlăm klei bhiăn ala čar, bi klă bruă klam mơ̆ng grăp anôk bruă, mđĭ hĭn klei bi mguôp, ngă bruă ksiêm dlăng, ktuê dlăng jêñ jêñ, hluê ngă mâo boh tŭ dưn, rơ̆ng klei tŭ dưn mơ̆ng klei bhiăn ala čar. Khua lăn čar mñă kơ dŭm anôk bruă ksiêm dlăng, bi êdah hdră êlan mlih mrâo, bi mbŏ dŭm klei čuăn hlăm klei bhiăn ala čar kơ klei bi kmhal hŏng klei djiê leh anăn ngă bruă bi kmhal hŏng klei mdjiê djăp ênŭm hnơ̆ng čuăn hlăm boh sĭt, hưn mdah hŏng dŭm anôk bruă mâo klei dưi ksiêm dlăng, bi klă.