Čih yap, bi mni dŭm boh tŭ dưi mâo hlăm hdră mă bruă mơ̆ng Anôk bruă kahan ksiêm ƀuôn prŏng, Khua lăn čar lač klă, hŏng klei găl mâo jing anôk phŭn hlăm hdră kđi čar, dhar kreh, duh mkra – ala ƀuôn, ƀuôn prŏng Hồ Chí Minh mâo bruă klam yuôm bhăn hŏng kluôm krĭng lehanăn ala čar.

Khua lăn čar mtă kơ Anôk bruă kahan ksiêm ƀuôn prŏng brei mđing kjăp kơ hdră mă bruă, thâo klă klei mâo ti grăp alŭ wăl, đru kčĕ kơ dŭm gưl, dhar bruă lehanăn bruă knŭk kna dŭm gưl mơ̆ng ƀuôn prŏng msir mghaih jăk klei êđăp ênang hlăm djăp boh klei. Khua lăn čar mtă kơ Êpul kahan ksiêm gang mkhư̆, truih mdjiê klei pui ƀơ̆ng lehanăn đru dŏng mnuih mâo klei truh mơ̆ng ƀuôn prŏng mđĭ boh tŭ hdră kriê dlăng Knŭk kna kơ hdră gang mkhư̆ klei pui ƀơ̆ng hŏng ai tiê “Khădah hlei pô, hlei êpul êya, brei hluê ngă kjăp hdră gang mkhư̆, truih mdjiê klei pui ƀơ̆ng”./.