Mphŭn hdră nao hlăm knăm đĭ păn bruă mơ̆ng Mtao Ăngle Charles III ti ala mtao Ăngle, tlam mmăt 5/5, hlue si mmông alŭ wăl, Khua lăn čar Võ Văn Thưởng nao čhưn hŏng phung knuă druh, mnuih mă bruă ti Anôk bruă bi ala leh anăn bi tuôm hŏng êpul êya mnuih Việt Nam ti ala mtao Ăngle. Ară anei mâo hlăm brô 100 êbâo čô mnuih Việt Nam dôk hdĭp mda, mă bruă, hriăm hră ti Ăngle, dôk ti djăp krĭng kwar ala mtao Ăngle.

Thŭn 2023, bi hdơr 50 thŭn mkŏ mjing klei bi hgŭm Việt Nam-Ăngle, Anôk bruă bi ala leh anăn dŭm êpul dôk pŏk ngă lu hdră kčah hưn mthâo Việt Nam ti London leh anăn lu ƀuôn prŏng mkăn hlăm kluôm ala mtao. Kah mbha hŏng mnuih ƀuôn sang klei khăp jăk siam mơ̆ng ƀuôn sang, lăn čar, Khua lăn čar Võ Văn Thưởng lač, bruă ngă mơ̆ng dŭm êpul đru mguôp hlăm bruă mđĭ bruă klam, kơhưm mnuih Việt Nam ti Ăngle, Khua lăn čar Võ Văn Thưởng mtă kơ mnuih ƀuôn sang Việt Nam ti Ăngle hlue ngă hdră bhiăn leh anăn ñŭ kma jăk hĭn tinei, lŏ dơ̆ng hgao klei dleh dlan dưi mâo lu klei tŭ dưn. Boh nik, brei mđĭ kjăp klei bi hgŭm, mkŏ êpul êya, mđing kơ ƀuôn sang, răng kriê dhar kreh djuê ana.