Ba m’ĭt asăp h’êč hmưi jăk siam truh kơ phung nai aê mdrao Việt Nam, Khua lăn čar Võ Văn Thưởng mñă, bruă mdrao mgŭn jing bruă yuôm êdi, đru răng mgang, kriê dlăng klei suaih pral mnuih ƀuôn sang lehanăn ba truh kơ jih jang gŏ sang, yang ƀuôn klei khăp thâo bi đru dlăng ba. Khua lăn čar čang hmăng phung aê mdrao ti Sang êa drao Nhi đồng 2 mđĭ lar dŭm boh tŭ dưi mâo hlăm wưng êgao mbĭt anăn lŏ dơ̆ng gĭr ba wĭt lu boh tŭ dưn mrâo, hgao jih klei lông dlăng dôk tlă anăp, amâo mdei gĭr ktưn.

Khua lăn čar mtă kơ phung khua kiă kriê ƀuôn prŏng, dŭm gưl, dhar bruă mđing dlăng, mkra mđĭ klei hdĭp mơ̆ng phung mă bruă mdrao mgŭn, amâo mdei gĭr mkra mđĭ anôk bruă nah gŭ, kdrăp yua mdrao mgŭn, mđing mjuăt bi hriăm phung mă bru mdrao mgŭn, boh nik tiŏ nao phung mda asei nao ksiêm hriăm ti dŭm ala čar đĭ kyar, mâo klei thâo hĭn kơ hdră mdrao mgŭn čiăng mđĭ lar knhuah gru kơ Sang êa drao gưl dlông./.