Ti anôk mdrao mgŭn kdriêk Thanh Liêm, Khua lăn čar nao čuă klei bi hmô drông phung ruă čŏng mă yua hră kak asei hrô kơ hră ênua bruă mdrao mgŭn, sa klei bi hmô ba wĭt boh tŭ dưn kơ phung ruă, boh nik jing bi hrŏ mmông ngă bruă kơ phung aw mdrao leh anăn mnuih ruă. Ƀri wưng hruê nai aê mdrao Việt Nam, bi ala kơ khua gĭt gai Đảng, knŭk kna, Khua lăn čar Võ Văn Thưởng mơĭt klei hơêč hmưi jăk siam hĭn, hŏng klei mpŭ, klei khăp truh kơ phung nai aê mdrao, phung ngă bruă mdrao mgŭn ti kdriêk Thanh Liêm leh anăn čar Hà Nam. Khua lăn čar yap yuôm bhăn mơ̆ng anôk mdrao mgŭn gưl să kơ dlông mơ̆ng kdriêk hluê ngă jăk dŭm hdră ala čar kñăm kơ bruă mdrao mgŭn nah gŭ, tlŏ mgang vaccine, kriê dlăng klei suaih pral, đru kčĕ hdră mdrao mgŭn, mkă dlăng hrŏng leh anăn kriê dlăng phung mâo klei ruă amâo mâo thâo hlao.  Khua lăn čar lač, tơdah bruă mdrao mgŭn nao gŭ ngă bruă tŭ dưn srăng đru mkŏ mjing êdei anăp kjăp hlăm alŭ wăl leh anăn lăn čar.

Khua lăn čar mñă kơ gưl bruă Đảng nah gŭ, bruă sang čư êa leh anăn dŭm anôk bruă djŏ  tuôm mơ̆ng čar Hà Nam, kdriêk Thanh Liêm lŏ dơ̆ng uêñ mĭn čiăng duh bi liê hĭn kơ bruă mdrao mgŭn nah gŭ hluê êlan duh bi liê mđĭ kyar mnuih mă bruă, hluê anăn mđĭ hnơ̆ng tŭ jăk bruă mdrao mgŭn mơ̆ng nah gŭ, lŏ dơ̆ng duh bi liê kơ kdrăp yua, mnơ̆ng yua, mkŏ mjing sang êa drao thâo mĭn, jăk, mtah, doh siam.