Tŭ drông Thongsavanh Phomvihane gưl tal êlâo hriê čuă ala čar Việt Nam hŏng bruă klam mrâo, Khua lăn čar Võ Văn Thưởng đăo knang, gưl hriê čuă anei srăng mtrŭt mđĭ ktang klei mjĕ giăm plah wah 2 Êpul bruă hŏng tač êngao 2 Đảng, đru mđĭ hĭn boh tŭ dưn bi mguôp kluôm dhuôm plah wah 2 Đảng, 2 ala čar hlăm wưng kơ anăp.

Khua Êpul bruă hŏng tač êngao gưl dlông Lào brei thâo, 2 anôk bruă mkŏ mjing jêñ jêñ dŭm klei bi trông êpul, bi klă hdră mă bruă, bi mguôp hlăm thŭn 2023 leh anăn bi trông kơ dŭm boh klei dôk bi mđing msĕ si hdră êlan bi mguôp hlăm wưng kơ anăp. Khua lăn čar mñă kơ 2 Êpul bruă hŏng tač êngao 2 Đảng čiăng mđĭ hĭn bruă kah mbha klei thâo hlăm djăp mta bruă, hŏng ai tiê bi mguôp hlăm bruă mă leh anăn klei khăp ayŏng adei, lŏ dơ̆ng bi đru, sa ai hŏng hdơ̆ng pô hlăm dŭm klei kƀĭn alŭ wăl leh anăn tar rŏng lăn.