Tŭ drông pô bi ala Venezuela Juan Carlos Fernandes Juarez, Khua lăn čar Võ Văn Thưởng hơêč hmưi kơ pô bi ala păn ngă bruă klam ti Việt Nam, đăo knang, hlăm wưng păn bruă mơ̆ng pô bi ala, klei mjĕ giăm bi mguôp Việt Nam – Venezuela srăng mâo lu boh tŭ dưn mrâo.

Khua lăn čar mñă klă, dŭm anôk bruă djŏ tuôm mơ̆ng Việt Nam srăng mâo klei đru čiăng kơ pô bi ala bi leh jih bruă klam, đru mtrŭt mđĭ klei mjĕ giăm dua ala čar. Tŭ drông pô bi ala Lào, aduôn Khamphao Ernthavanh, Khua lăn čar Võ Văn Thưởng mñă klă, klei mjĕ giăm Việt Nam – Lào klă klơ̆ng jing klei mjĕ giăm bi hgŭm, bi mguôp mâo phung khua gĭt gai nao êlâo mơ̆ng 2 ala čar mdưm tur knơ̆ng, mkŏ mjing leh anăn ksul mbŭ, jing ngăn dŏ yuôm bhăn mơ̆ng dua djuê ana. Khua lăn čar Võ Văn Thưởng mñă klă, dŭm anôk bruă djŏ tuôm mơ̆ng Việt Nam srăng đru, bi mguôp hŏng pô bi ala bi leh jih bruă klam.