Khua lăn čar Võ Văn Thưởng hơêč hmưi kơ khua bi ala ngă leh bruă tŭ jing êjai hlăm wưng dôk păn bruă ti Việt Nam hŏng lu bruă yuôm bhăn hlăm klei mđĭ kyar klei bi hgŭm lu mta bruă mơ̆ng dua ala čar. Wưng leh êgao klei duh mkra mnia mblei dua ala čar đĭ kyar kjăp, siămdah khua lăn čar lač boh tŭ dưn anăn ka năng ôh hŏng klei găl klei dưi mơ̆ng dua ala čar dôk mâo, lehanăn čang hmăng klei bi hgŭm dua nah đĭ hĭn.

Dua nah pral srăng truh kơ klei bi kƀĭn tal 24 mơ̆ng êpul bruă hgŭm knŭk kna Việt Nam- Bulgaria kơ klei hdŭm duh mkra mnia mblei, lehanăn bruă kreh knhâo hlăm thŭn 2023; čang hmăng kơ Bulgaria pral bi klă klei kuôl kă đru mgang klei duh bi liê Việt Nam - EU, mjing klei găl kơ phung duh mkra EU, Bulgaria lehanăn Việt Nam mâo klei bi hgŭm jăk hĭn hlăm bruă hdơ̆ng găp. Dua nah lŏ dơ̆ng bi mguôp, bi đru sa ai hlăm djăp bruă bi trông hŏng tač êngao./.