VOV4.Êđê - Aguah mbruê, ti sang bruă Khua lăn čar, Khua lăn čar Nguyễn Xuân Phúc gĭt gai leh knăm tŭ drông Khua mil čhil Greek aduôn Katerina Sakellaropoulou klă klơ̆ng hriê čuă ala čar Việt Nam mơ̆ng hruê 15 - 19/5 hluê si klei iêo jak mơ̆ng Khua lăn čar Nguyễn Xuân Phúc. Leh knăm tŭ drông, 2 čô khua gĭt gai srăng mâo klei blŭ hrăm.

Hlăm klei hriê čuă, Khua mil čhil Greek Katerina Sakellaropoulou srăng dưm kwang mnga ti knưng bi hdơr phung lĭng kahan djiê êngiă, dưm kwang mnga ti msat khua gĭt gai Hồ Chí Minh, bi tuôm hŏng Khua gĭt gai Đảng Nguyễn Phú Trọng, Khua bruă kƀĭn ala Vương Đình Huệ, knăm bi klă hră mơar leh anăn bi tuôm hŏng phung čih klei mrâo, nao čuă dlăng Văn Miếu leh anăn nao hlăm dŭm mta bruă hlăm alŭ wăl. Klei hriê čuă đru bi kjăp klei đăo knang bruă kđi čar, bi êlam hĭn klei bi mguôp hlăm lu mta bruă msĕ si bruă kđi čar - bruă hŏng tač êngao, bruă duh mkra, dhar kreh, hiu čhưn ênguê, ba klei jĕ giăm 2 tĭng klă klơ̆ng hĭn, mâo boh tŭ dưn hĭn.

Y-Bel pô mblang