Klei hriê čuă amâo djŏ knŏng hdră bruă hŏng tač êngao yuôm bhăn ƀiădah lŏ bi êdah klei dlăng yuôm bhăn leh anăn klei ƀuăn mơ̆ng Russia hŏng klei mjĕ giăm bi mguôp lu mta bruă hŏng Việt Nam. Mbĭt anăn ăt bi êdah Việt Nam hur har ngă hdră êlan hŏng tač êngao êngiê, čŏng pô, lu jơr, lu tĭng, kyua boh tŭ dưn lăn čar, djuê ana, đru mguôp hlăm klei êđăp ênang, hơĭt kjăp tar rŏng lăn.

Hlăm gưl hriê čuă mơ̆ng Khua mil čhil Putin, khua gĭt gai dua ala čar srăng bi trông leh anăn tă hdră kơ klei bi hgŭm kluôm dhuôm truh ti thŭn 2030, bi klă hĭn dŭm mta bruă bi mguôp phŭn, mơ̆ng bruă duh mkra, mnia mblei, bruă lĭng kahan, pui kmlă, klei kreh knhâo mrâo mrang truh kơ bruă mtô mjuăt bi hriăm, dhar kreh, mjĕ mjuk mnuih ƀuôn sang. Dŭm mta kñăm wưng sui leh anăn hdră êlan ngă bruă dưi bi êdah leh, kñăm rơ̆ng kơ klei đĭ kyar kjăp leh anăn tŭ dưn mơ̆ng klei mjĕ giăm dua tĭng hlăm êdei anăp.