VOV4.Êđê - Aguah mbruê 1/8, Khua hlăm Phŭn bruă kđi čar, khua hlăm bruă Đảng gưl dlông, Khua phat kđi sang phat kđi gưl dlông Nguyễn Hoà Bình mâo leh klei mă bruă ti čar Kon Tum. Nguyễn Hoà Bình mñă klă, sang phat kđi čar Kon Tum čiăng lŏ mâo dŭm hdră mkŏ mjing dŭm klei phat kđi bi mgrăng čiăng mkŏ mjing klei sa ai prŏng hĭn hlăm yang ƀuôn, dêč kơ dŭm klei phat kđi amâo mâo năng.

Ksiêm duah hnưm hdră êlan mkŏ mjing klei phat kđi hŏng êlan online, mơ̆ng anăn dưi mđĭ kyar klei bi hmô Sang phat kđi điện tử, đru mkiêt mkriêm hruê mmông, prăk kăk leh anăn djŏ guôp hŏng wưng ară anei. Mđĭ hĭn bruă hluê ngă jăk, mđĭ hnơ̆ng klei phat kđi leh anăn rơ̆ng klei tŭ kơ mnuih ƀuôn sang. Ƀri wưng nao mă bruă, Khua phat kđi sang phat kđi gưl dlông Nguyễn Hoà Bình mbĭt hŏng êpul ngă bruă nao myơr brui ngưi, kwang mnga ti msat lĭng kahan djiê êngiă kdriêk Kon Braih, nao čuă dlăng wăl kriê pioh klei dưi Kon Briah leh anăn sang bi hdơr kơ phung lĭng kahan djiê êngiă Kon Briah, kdriêk Kon Briah.

            Y-Ƀel pô mblang