VOV4.Êđê- Ti anôk bruă hŏng tač êngao, Khua phŭn bruă Bùi Thanh Sơn drông leh K’iăng khua phŭn bruă hŏng tač êngao India Saurabh Kumar ƀri gưl čhưn ti Việt Nam lehanăn hrăm mbĭt gĭt gai Klei bi kƀĭn tui ksiêm bruă kđi čar tal 12 lehanăn klei bi blŭ hrăm tal 9 plah wah Phŭn bruă hŏng tač êngao dua ala čar mơ̆ng hruê 29 - 31/5/2022. Tai knăm anei, Khua phŭn bruă Bùi Thanh Sơn mtă kơ dua tĭng lŏ mtrŭt mđĭ dŭm hdră bi hgŭm yuôm bhăn msĕ si: Bruă kđi čar – hŏng tač êngao, bruă lĭng kahan – răng mgang klei êđăp ênang, bruă mnia mblei – duh bi liê, bruă kreh knhâo – kdrăp mrâo, bruă dhar kreh lehanăn bi mjĕ mjuk mnuih ƀuôn sang, boh nik mtrŭt hdră bi hgŭm hlăm bruă hiu čhưn ênguê hlăk dua ala čar pŏk leh ƀăng knông lăn lehanăn pŏk dŭm hdră bruă yuôm bhăn kñăm bi hdơr 50 thŭn Hruê mkŏ mjing klei bi mjĕ (1972 - 2022). K’iăng khua phŭn bruă hŏng tač ênggao India mñă klă, India dlăng Việt Nam jing ƀĭng hgŭm yuôm hlăm hdră mtrŭn “Mđing truh kơ nah Ngŏ” mbĭt anăn ƀuăn mtrŭt mđĭ hĭn Klei bi mjĕ ƀĭng hgŭm kluôm dhuôm plah wah dua ala čar hlăm wưng ti anăp./.

                                                    Pô mblang: H’Nêč Êñuôl