VOV4.Êđê - Tlam mbruê 15/7, ti ƀuôn prŏng Đà Lạt, khua phŭn bruă hdră êlan leh anăn duh bi liê Nguyễn Chí Dũng mbĭt hŏng êpul ngă bruă mâo leh mmông mă bruă hŏng čar Lâm Đồng. Mmông mă bruă kñăm bi klă boh tŭ 20 thŭn hruê ngă hdră mtrŭn mrô 10 leh anăn 10 thŭn hluê ngă klei bi klă mrô 12 mơ̆ng phŭn bruă kđi čar ti alŭ wăl. Hluê anăn dưi ƀuh, bruă duh mkra čar Lâm Đồng mâo klei đĭ kyar ktang wăt kơ boh prŏng leh anăn hnơ̆ng tŭ jăk.

Klei đĭ kyar bruă duh mkra kah knar 10,4%, hnư knŭk kna hrui wĭt mâo 504 êklai prăk ti thŭn 2002 đĭ truh kơ 11.000 êklai prăk ti thŭn 2021, kluôm ênoh prăk duh bi liê yang ƀuôn ti thŭn 2021 mâo 27.365 êklai prăk, đĭ êbeh 19 blư̆ mkă hŏng thŭn 2002. Mbĭt hŏng anăn, klei bi lông, bi ktưn mơ̆ng bruă duh mkra ăt đĭ ktang, bruă duh mkra ala ƀuôn mâo nanao klei uêñ mĭn leh anăn bi kluôm ênŭm, mlih mrâo, hluê ngă jăk bruă lăm lui klei ư̆ êpa, bi hrŏ klei ƀun ƀin, rơ̆ng kjăp klei êđăp ênang yang ƀuôn.

Y-Ƀel pô mblang