VOV4.Êđê- Tŭ ư asăp jak iêu mơ̆ng Khua phŭn bruă hŏng tač êngao Bùi Thanh Sơn, Khua phŭn bruă hŏng tač êngao Panama Érika Mouynes klă klơ̆ng hriê čhưn ti Việt Nam mơ̆ng hruê 05 - 06/4/2022. Ti sang drông tuê knŭk kna, Khua phŭn bruă Bùi Thanh Sơn bi trông leh hŏng Khua phŭn bruă Érika Mu-nết. Dua tĭng hưn mthâo leh kơ hdră đĭ kyar mơ̆ng grăp ala čar, bi trông dŭm hdră mđĭ klei bi hgŭm hlăm bruă kđi čar, bruă hŏng tač êngao, bruă duh mkra, bruă mnia mblei, bruă lŏ hma... ăt msĕ mơh hdră bi hgŭm ti dŭm anôk bi kƀĭn trông lu tĭng mkăn. Dua khua phŭn bruă ăt čang hmăng mtrŭt mđĭ hdră bi hgŭm plah wah 2 ala čar hlăm dŭm mta bruă dôk mâo klei găl msĕ si bruă dŭ mdiăng hlăm êlan êa ksĭ, mdrơ̆ng hŏng klei bi mlih yan adiê, mkra mjing pui kmlă... mbĭt anăn hưn mdah klei mĭn msir mghaih dŭm klei bi kuan hŏng hdră êđăp ênang djŏ si hdră bhiăn./.

                                                   Pô mblang: H’Nêč Êñuôl