VOV4.Êđê - Ƀri wưng nao čuă ala čar Indonesia leh anăn hrăm mbĭt gĭt gai kƀĭn kƀĭn tal 4 dhar bruă bi mguôp Việt Nam – Indonesia (JCBC-4), aguah mbruê 20/7, Khua phŭn bruă hŏng tač êngao Bùi Thanh Sơn bi tuôm leh hŏng Khua mil čhil Indonesia Joko Widodo ti sang Khua mil čhil Indonesia. Khua phŭn bruă hŏng tač êngao Bùi Thanh Sơn mñă klă klei mĭn mơ̆ng Việt Nam jing dlăng yuôm bhăn leh anăn hmăng hmưi mđĭ hĭn klei bi mguôp hdră êlan hŏng Indonesia, bi êdah klei đăo knang Indonesia srăng ngă jăk bruă klam jing khua gĭt gai G20, ngă tŭ jing “Hdră tă Indonesia truh ti thŭn 2045”, leh anăn jing ala čar đĭ kyar djŏ hlăm wưng bi hdơr 100 thŭn mkŏ mjing ala čar ti thŭn 2045. Khua phŭn bruă hŏng tač êngao Bùi Thanh Sơn bi êdah klei hmăng hmưi Khua mil čhil Indonesia sa ai mtrŭt mđĭ klei bi trông êpul, bi tuôm gưl dlông leh anăn dŭm gưl, bi hrŏ klei dleh kpăk leh anăn mtrŭt mđĭ klei mnia mblei hluê êlan mtăp mđơr hĭn.

Y-Ƀel pô mblang