Dŭm mlan akŏ thŭn 2023, kluôm hnư knŭk kna hrui wĭt ti čar Gia Lai mâo 2000 êklai prăk. Kluôm hnơ̆ng čhĭ hliê mnơ̆ng dhơ̆ng leh anăn bruă mkăn hlăm 4 mlan đăo knăl mâo êbeh 30 êbâo êklai prăk, đĭ êbeh 25% mkă hŏng wưng anei thŭn dih. Hnơ̆ng klei mnia mblei 4 mlan đăo knăl mâo 310 êklăk dolar, hlăm anăn mnơ̆ng dhơ̆ng mnia mblei phŭn jing kphê, ksu đĭ wăt kơ hnơ̆ng leh anăn ênoh.

Thŭn anei, Gia Lai dưi jao hdră êlan brei čan duh bi liê bruă knŭk kna êbeh 4000 êklai prăk, yap truh kơ ară anei knŏng mrâo brei čan mă 335 êklai prăk. Blŭ hlăm mmông mă bruă, Khua phŭn bruă hŏng tač êngao Bùi Thanh Sơn yap yuôm bhăn dŭm boh tŭ dưn čar Gia Lai dưi mâo hlăm dŭm mta bruă leh anăn mñă kơ čar lŏ dơ̆ng bi lar dŭm klei găl, mđĭ hĭn klei bi mguôp hŏng tar rŏng lăn čiăng pŏk phao anôk mnia mblei. Bi kơ ngăn prăk dŭm hdră, Khua phŭn bruă hŏng tač êngao Bùi Thanh Sơn lač, hnơ̆ng klei brei čan duh bi liê bruă knŭk kna ti Gia Lai jing êmưt êdi, kyuanăn čar čiăng mâo hdră êlan kơ boh klei anei.