VOV4.Êđê -  Tlam mbrue (29/3), ti Hà Nội, Đại tướng Tô Lâm, Khua phŭn bruă kahan ksiêm drông leh Vladimir Baravikov, Khua bi ala mrâo kơ knŭk kna Belarus ti Việt Nam hriê kkuh čhưn ƀri wưng păn bruă mrâo ti Việt Nam. Khua phŭn bruă Tô Lâm hơêč hmưi kơ Khua bi ala ngă bruă ti Việt Nam hŏng klei tŭ jing, đru mtrŭt mđĭ klei bi hgŭm plah wah dua ala čar čhuang hlăm knhuang mrâo, čang hmăng kơ khua bi ala lŏ dơ̆ng sa ai, lehanăn mjing kdrông pŏk mlar klei bi mguôp plah wah Phŭn bruă kahan ksiêm Việt Nam hŏng dŭm anôk bruă ti Belarus. Khua phŭn bruă Tô Lâm mñă, hlăm dŭm thŭn leh êgao, klei bi hgŭm kơ bruă kđi čar, bruă duh mkra, bruă dhar kreh yang ƀuôn, bruă răng mgang klei êđăp ênang plah wah dua ala čar Việt Nam Belarus amâo mâo mdei dưi hyuă kjăp mđĭ kyar, čăng hmăng kơ dua nah lŏ dơ̆ng hgŭm mbĭt kjăp hĭn, lehanăn bi đru hdơ̆ng găp hlăm dŭm anôk bi kƀĭn hŏng tač êngao ti wưng kơ anăp, đru mguôp hlăm klei êđăp ênang, hơĭt kjăp hlăm alŭ wăl lehanăn tar rŏng lăn./.

Y-Khem pô mblang