VOV4.Êđê - Tlam hruê 27/4, Êpul mă bruă mơ̆ng Dhar bruă djuê ana mâo Khua phŭn bruă, Khua dhar bruă Djuê ana Hầu A Lềnh, ngă khua êpul mâo leh mmông mă bruă hŏng Anôk bruă sang čư̆ êa čar Gia Lai kơ hdră bruă djuê ana lehanăn mđĭ kyar bruă duh mkra – ala ƀuôn krĭng mnuih ƀuôn sang djuê ƀiă lehanăn krĭng čư̆ čhiăng.

Hŏng hdră bruă ala čar kñăm mđĭ kyar bruă duh mkra – ala ƀuôn krĭng mnuih ƀuôn sang djuê ƀiă lehanăn krĭng čư̆ čhiăng wưng thŭn 2021-2025, čar Gia Lai akâo kơ gưl dlông đru giăm 6 êbâo êklai prăk čiăng kơ alŭ wăl pŏk hluê ngă dŭm hdră đru kơ yang ƀuôn, hdră msir klei ư̆ êpa bi hrŏ klei ƀun knap. Ti knăm anei, Hầu A Lềnh lač, čar Gia Lai mâo leh klei mđing dlăng kơ hdră bruă djuê ana. Čar mâo leh dŭm hdră mtrŭn mđĭ kyar bruă duh mkra – ala ƀuôn krĭng mnuih djuê ƀiă. Hầu A Lềnh mtă kơ Gia Lai mđing kơ hdră duh bi liê mâo boh phŭn hĭn kơ krĭng mnuih ƀuôn sang djuê ƀiă, mđing kơ krĭng dôk ƀun knap./.

H’Nêč pô mblang