Hrue phung hđeh êlăk tar rŏng lăn (1/6) lehanăn ăt jing hrue mbŏ  mnơ̆ng tŭ jăk, hlăm 2 hrue 1 lehanăn 2/6, Phŭn bruă mdrao mgŭn ngă bruă mkăp vitamin A gưl 1 thŭn 2023 kơ hđeh hlăm kluôm ala. Khua phŭn bruă mdrao mgŭn Đào Hồng Lan nao ksiêm bruă mkăp êa drao ti ƀuôn hgŭm Điện Biên, kdriêk čar Ba Đình, Hà Nội. Hâo mdah hŏng êpul ngă bruă phŭn bruă mdrao mgŭn, khua knơ̆ng bruă mdrao mgŭn Hà Nội Trần Thị Nhị Hà brei thâo: Gưl anei hlăm ƀuôn prŏng phŭn mâo êbeh 630.000 čô hđeh djŏ hlăm thŭn mnăm êa drao vitamin A, ti 1.744 anôk.

Khua phŭn bruă mdrao mgŭn brei thâo, ênoh êa drao anei mâo êpul bruă Vitamin Angel – mơ̆ng Mi pô đru. Wưng leh êgao, kyua kƀah êa drao, snăn ênoh mbha êa drao thŭn anei êmưt mơh. Tĭng hlăm brô 6 êklăk čô hđeh hlăm kluôm ala dưi mnăm mbŏ êa drao Vitamin A. Bi ti 22 boh čar čư̆ čhiăng dleh dlan, ênoh phung hđeh mâo mnăm êa drao anei jing mơ̆ng 6 - 59 mlan. Mbĭt hŏng anăn, hđeh mơ̆ng 24 - 59 mlan lŏ dưi mnăm êa drao kmuôt truh mlan bi kčah. Bruă anei đru leh kơala čar drei dưi mgaih klei ruă ală kyua kƀah vitamin A hlăm thŭn 2000./.