VOV4.Êđê - Tlam mbruê 27/4, ti Hà Nội Đại tướng Tô Lâm, khua phŭn bruă kahan ksiêm drông leh Gunnar Wiegand khua kiă kriê klam bruă krĭng Asi – Pacific, mơ̆ng anôk bruă hŏng tač êngao Ơrôp dôk mâo klei hriê čuă, mă bruă ti Việt Nam. Blŭ hlăm mmông tŭ drông, khua phŭn bruă Tô Lâm mñă klă, hruê mmông kơ anăp, Êpul hgŭm Ơrôp (EU) srăng lŏ kah mbha klei thâo kơ bruă rơ̆ng klei êđăp ênang êlan internet hŏng dŭm bruă mkŏ mkra bruă hâo hưn yuôm bhăn, hdră răng mgang klei čih pioh hlăm dŭm mta bruă yuôm bhăn, mđĭ hĭn klei bi trông, kah mbha klei thâo, nao hgŭm mkŏ mjing, bi kluôm ênŭm hdră klei bhiăn ala čar kơ klei êđăp ênang êlan internet, klei dưi kiă kriê ala čar hlăm êlan internet, klei bi ksŭng ngă êlan internet. Gunnar Wiegand mñă klă, klei jĕ giăm, bi mguôp plah wah EU – Việt Nam dôk đĭ kyar, amâo mâo djŏ knŏng mdei hlăm bruă duh mkra, mnia mblei, duh bi liê ƀiădah lŏ bi mguôp hlăm bruă kđi čar, bruă hŏng tač êngao, klei êđăp ênang, dŭm mta bruă mâo knhuah hdră êlan.

Y-Ƀel pô mblang