Leh hmư̆ khua gĭt gai čar Dak Lak hưn klă klơ̆ng kơ klei luč êđăp ênang hlăm aguah 11/6 mrâo êgao, Khua phŭn bruă Tô Lâm bi mklă, bruă mâo ti kdriêk Čư̆ Kuiñ, čar Dak Lak hlăm aguah 11/6 jing klei ngă măk ƀai, luč klei êđăp ênang kjham, mâo êpul bruă, jhŏng snăk. Phŭn bruă kahan ksiêm gĭt gai dŭm anôk bruă pral ngă bruă duah mă phung anei, mbĭt anăn tiŏ nao phung kahan rơ̆ng êđăp ênang kơ mnuih ƀuôn sang.

Khua phŭn bruă Tô Lâm bi mklă, truh ară anei, jih jang êpul hgŭm hlăm bruă anei mâo mă kơ̆ng leh sơăi, klei êđăp ênang ti čar Dak Lak wĭt msĕ aguah tlam. Khua phŭn bruă mtă kơ čar Dak Lak hlăm wưng kơ anăp amâo dưi ngă ngơi mang, brei rơ̆ng klei êđăp ênang ala čar mơ̆ng anôk bruă nah gŭ, êngao anăn, brei mđĭ bruă klam phung ba anăp. Hlăm klei rơ̆ng êđăp ênang ala čar dŭm krĭng phŭn, boh nik krĭng Lăn Dap Kngư, brei mđĭ ktang, bi mguôp kjăp plah wah gang mkhư̆ ala ƀuôn leh anăn gang mkhư̆ bruă knuă.

 Hlăm knăm anei, Khua phŭn bruă Tô Lâm mđup brei leh Hră pah mni mơ̆ng Phŭn bruă kahan ksiêm kơ 5 čô jing mnuih ƀuôn sang mâo leh klei tŭ êdah kdlưn hlăm hdră jih jang mnuih ƀuôn sang răng mgang čar kwar, đru rơ̆ng klei êđăp ênang ti alŭ wăl./.