VOV4.Êđê- Tlam mbruê 22/8, Êpul bi ala gưl dlông Việt Nam mơ̆ng Đại tướng Tô Lâm, Khua hlăm phŭn bruă kđi čar, Khua phŭn bruă kahan ksiêm jing khua êpul nao leh hlăm klei kƀĭn trông ksiêm êmuh khua gĭt gai gưl dlông klei êđăp ênang Êpul hgŭm dŭm ala čar Ngŏ Dhŭng Asi (ASEAN) – Russia gưl tal 1 mkŏ mjing hŏng êlan online. Leh knăm pŏk klei kƀĭn, Phung khua êpul dŭm ala čar bi trông leh kơ dŭm boh klei bi hơĭt hdră êlan ti Asi – Pacific, mâo wăt hdră ksiêm dlăng phao ktuang leh anăn amâo mâo bi lar phao ktuang, klei hmăi mơ̆ng phao ktuang hŏng klei êđăp ênang alŭ wăl, boh sĭt klei êđăp ênang, bruă kđi čar ti alŭ Asi – Pacific hlăm wưng klei amâo thâo bi djŏ dôk đĭ plah wah dŭm ala čar prŏng.

Čiăng mđĭ hĭn klei bi mguôp plah wah Russia – ASEAN hlăm hruê mmông kơ anăp, khua phŭn bruă Tô Lâm mñă kơ Russia lŏ hur har hĭn hlăm dŭm klei kƀĭn mơ̆ng ASEAN gĭt gai, sa ai hŏng bruă klam leh anăn klei gĭr mơ̆ng ASEAN mtrŭt mđĭ klei blŭ hrăm, bi mguôp leh anăn bi mdrơ̆ng hŏng dŭm klei lông dlăng tam mâo, hlăm anăn mâo klei êđăp ênang bruă dŭ mdiăng êlan êa ksĭ leh anăn êlan êdeh phiơr ti alŭ wăl…

Pô mblang: Y-Ƀel Êban