VOV4.Êđê- Hruê mbruê 21/9, Klei kƀĭn trông khua phŭn bruă ASEAN kơ bruă gang mkhư̆ phung ngă soh hluh ala čar tal 16 hŏng akŏ “ASEAN ngă bruă mdrơ̆ng hŏng dŭm klei lông dlăng” leh anăn dŭm klei kƀĭn djŏ tuôm klă klơ̆ng kčưm pŏk hluê êlan online. Đại tướng Tô Lâm, Khua hlăm phŭn bruă kđi čar, Khua phŭn bruă kahan ksiêm Việt Nam nao hlăm klei kƀĭn anei.

Blŭ hlăm klei kƀĭn, Khua phŭn bruă Tô Lâm brei thâo hluê si bruă mkŏ mjing “klei đăo knang bruă kđi čar” hlăm bruă gang mkhư̆ phung ngă soh hluh ala čar leh anăn mkŏ mjing klei đăo knang hdơ̆ng pô, phung khua êmua hluê ngă klei bhiăn ASEAN čiăng lŏ bi kjăp leh anăn mtrŭt mđĭ mâo boh tŭ dưn, klă klơ̆ng hlăm dŭm hdră bruă, hdră bi mguôp hlăm bruă gang mkhư̆ phung ngă soh hluh ala čar hlăm dŭm hdră bi mguôp lu tĭng mơ̆ng ASEAN dôk mâo. Mbĭt anăn mtrŭt mđĭ bruă hâo hưn leh anăn kah mbha klei thâo hlăm klei bi kdơ̆ng hŏng êpul phung ngă soh hluh ala čar ti alŭ wăl, boh nik jing phung ngă soh kơ matuĭ, phung ngă soh hlăm Internet leh anăn phung ngă soh dưn yua kdrăp mrâo mrang.

Pô mblang: Y-Ƀel Êban