VOV4.Êđê- Mmăt hruê 17/8, bruă Đảng, bruă sang čư̆ êa ƀuôn hgŭm Quán Thánh, kdriêk Ba Đình, ƀuôn prŏng Hà Nội mkŏ mjing “Hruê jih jang mnuih ƀuôn sang răng mgang klei êđăp ênang ala čar”. Đại tướng Tô Lâm – Khua phŭn bruă kahan ksiêm nao lehanăn blŭ hrăm ti knăm anei. 17 thŭn êgao, Knăm anei ti ƀuôn hgŭm Quán Thánh pŏk leh lu hdră bruă klă sĭt, tŭ dưn lehanăn mâo ai lar bra, mơ̆ng anăn mđĭ lar ai ktang mơ̆ng anôk bruă kđi čar hlăm bruă răng mgang klei êđăp ênang ala čar, klei êđăp ênang ala ƀuôn.

Blŭ ti knăm anei, Khua phŭn bruă Tô Lâm čih yap lehanăn bi mni dŭm boh tŭ mâo phung knuă druh, mnuih ƀuôn sang ƀuôn hgŭm Quán Thánh dưi mâo hlăm hdră anei wưng êgao. Khua phŭn bruă lač, dŭm hdră hlăm knăm anei brei ƀuh ai êwa hơ̆k m’ak, ai tiê hgŭm mguôp lehanăn klei sa ai, đăo knang mơ̆ng mnuih ƀuôn sang hlăm hdră kiă kriê mơ̆ng Đảng, bruă sang čư̆ êa lehanăn êpul kahan ksiêm alŭ wăl; mnuih ƀuôn sang dưi mđĭ lar klei ngă phŭn mil pô lehanăn čŏng pô hlăm hdră jih jang mnuih ƀuôn sang răng mgang klei êđăp ênang ala čar mjing klei hgŭm mguôp prŏng, đru krơ̆ng kjăp klei êđăp ênang hlăm djăp boh klei mâo./.

                                                    Pô mblang: H’Nêč Êñuôl