VOV4.Êđê - Hlăm thŭn 2021, wăt tơdah hmaĭ lu mơ̆ng klei ruă Covid-19, Sang mđung asăp blŭ Việt Nam bi mklă leh bruă klam jing anôk bruă klei mrâo phŭn, bi leh jăk bruă klam dưi jao, đru mguôp prŏng kơ bruă hâo hưn leh anăn mtô mblang”. Anăn jing klei bi mklă mơ̆ng Khua phŭn bruă hâo hưn leh anăn mtô mblang, K’iăng Khua Dhar bruă hâo hưn mtô mblang gưl dlông Nguyễn Mạnh Hùng hlăm klei bi kƀĭn ksiêm wĭt bruă knuă thŭn 2021 leh anăn pŏk ngă bruă klam thŭn 2022 mơ̆ng Sang mđung asăp blŭ Việt Nam. Hlăm thŭn êgao, Sang mđung asăp blŭ Việt Nam păn kjăp hdră tă, klei gĭt gai mơ̆ng Knŭk kna, Khua Knŭk kna, Anôk bruă hâo hưn mtô mblang gưl dlông, Phŭn bruă hâo hưn mtô mblang gưl dlông, kƀĭn hâo hưn lu bruă, klei bi kƀĭn prŏng hlăm ala čar hlăm lu mta hdră, tur knơ̆ng, kdrăp mnơ̆ng, lu klei blŭ. Boh nik, hlăm boh klei Covid-19 bluh mâo ktang hlăm thŭn 2021, Sang mđung asăp blŭ Việt Nam mkŏ mjing leh dŭm gưl hâo hưn êlam kơ hdră gang mkhư̆ klei ruă tưp. Thŭn 2022, Khua hlăm bruă Đảng gưl dlông, Khua Sang mđung asăp blŭ Việt Nam mñă klă: Sang mđung asăp blŭ Việt Nam srăng kƀĭn jih hnơ̆ng kơ bruă lŏ mkra mlih leh anăn kƀĭn ba yua mrô čiăng ngă jăk bruă kđi čar mâo Đảng leh anăn Knŭk kna jao.

Thŭn 2022, Sang mđung asăp blŭ Việt Nam srăng mkŏ mjing Klei bi lông hdră mđup asăp kluôm ala tal XV ti ƀuôn prŏng Hồ Chí Minh leh anăn Hdră bruă kđi čar - kdŏ mmuiñ Bi hdơr 92 thŭn hruê mkŏ mjing Đảng Cộng sản Việt Nam.

H’Zawut pô mblang