VOV4.Êđê- Thượng tướng Trần Quang Phương, khua hlăm bruă Đảng gưl dlông, k’iăng khua bruă kƀĭn ala mrâo nao čuă leh anăn mă bruă hŏng êpul grŭp Viettel. Pah mni dŭm boh tŭ dưi mâo mơ̆ng Viettel, Thượng tướng Trần Quang Phương yap yuôm bhăn dŭm klei gĭr ktưn mơ̆ng Viettel hlăm bruă klam mkra mjing, mnia mblei leh anăn rpư̆ng klei êđăp ênang ala čar mơ̆ng Viettel.

Hlăm bruă lĭng kahan, Viettel mâo klei ksiêm duah, mka mjing dŭm mta mnơ̆ng dhơ̆ng bruă duh tia kdrăp mrâo mrang, đru bi mrâo mrang lĭng kahan. Yap yuôm bhăn bruă duh bi liê ti ala tač êngao mơ̆ng Viettel, k’iăng khua bruă kƀĭn ala lač bruă anei amâo djŏ knŏng đru mđĭ kyar bruă duh mkra ala ƀuôn  biădah lŏ mkŏ mjing rup anak mnuih Việt Nam mrâo mrang, hưn mdah klei mrâo mrang Việt Nam hŏng mah jiăng ala tač êngao, boh tŭ duh bi liê kơ ala tač êngao mơ̆ng Viettel đru mguôp hlăm bruă răng mgang ala čar mơ̆ng kbưi.

Pô mblang: Y-Ƀel Êban