VOV4.Êđê – Hruê mbruê, K’iăng khua bruă kƀĭn ala Trần Quang Phương mbĭt hŏng êpul ngă bruă mâo leh klei nao čuă, hơêč hmưi Tết ti Trung đoàn kahan ksiêm knhăk krĭng yŭ dhŭng leh anăn Lữ đoàn klei hâo hưn 29, wăl kahan 9. Hưn mdah hŏng k’iăng khua kƀĭn ala Trần Quang Phương hŏng êpul ngă bruă Thượng tá Nguyễn Tấn Phúc, khua kiă kriê trung đoàn kahan ksiêm knhăk krĭng Yŭ Dhŭng brei thâo, truh kơ ară anei, klei mkŏ mjing, gĭt gai mơ̆ng dŭm gưl hlăm trung đoàn mâo leh klei hơĭt leh anăn ƀrư̆ ƀrư̆ đĭ hriê kơ prŏng, rơ̆ng kjăp êpul ngă bruă leh anăn mprăp bi mguôp hŏng dŭm anôk bruă mơ̆ng phŭn bruă kahan ksiêm, kahan ksiêm alŭ wăl, bi rai dŭm ngă soh prŏng, msir mgaih dŭm klei mjêč, dleh ksiêm dlăng kơ klei êđăp ênang, bi mdrơ̆ng, mkhư̆ phung ngă soh. Blŭ hlăm klei nao čuă, k’iăng khua bruă kƀĭn ala Trần Quang Phương mtă, hlăm hruê mmông kơ anăp, anôk bruă čiăng hyuă kjăp hĭn leh anăn tui ngă jăk hĭn dŭm asăp mtrŭn mơ̆ng Đảng, knŭk kna, knơ̆ng gĭt gai lĭng kahan gưl dlông, Bruă Đảng kahan ksiêm gưl dlông, phŭn bruă kahan ksiêm kơ bruă klam klei êđăp ênang. Ti anăp jing rơ̆ng klei êđăp ênang hlăm wưng tết Nguyên đán Nhâm Dần năm 2022 hluê si asăp mtrŭn mơ̆ng khua gĭt gai gưl dlông, êngao kơ anăn, khua gĭt gai anôk bruă čiăng răng kriê jăk hĭn kơ klei hdĭp phung knuă druh, lĭng kahan.

Y-Ƀel pô mblang