Lu phung bi ala să Tịnh Khê, ƀuôn prŏng Quảng Ngãi bi êdah klei rŭng răng kơ klei ksĭng mmiă lăn ala, rŭ mdơ̆ng soh hdră bhiăn, ngă soh hŏng klei êđăp ênang ƀuôn prŏng; dŭm klei bhiăn, hdră êlan adôk mtŭl mtŭl hmăi kơ klei msir mgaih klei dưi dưn hdră êlan knŭk kna đru kơ mnuih ƀuôn sang. K’iăng Khua bruă kƀĭn ala Trần Quang Phương čih pioh klei phung bi ala kơ mnuih ƀuôn sang akâo leh anăn mtă kơ khua gĭt gai čar Quảng Ngãi leh anăn dŭm anôk bruă thơ̆ng kƀĭn msir mgaih, wĭt lač.

Hŏng klei akâo mâo hnơ̆ng ala čar, Êpul bi ala Bruă kƀĭn ala čih yap leh anăn srăng mâo klei blŭ hŏng dŭm phŭn, dhar bruă gưl dlông. Djŏ tuôm hŏng klei gun kpăk kyua Hdră bhiăn lăn ala mrâo hlăm boh sĭt, K’iăng Khua bruă kƀĭn ala Trần Quang Phương lač klă: “12 êklăk klei mnuih ƀuôn sang lač kơ Hdră bhiăn lăn ala anei tơdah mprăp bi mklă, mă klei blŭ mnuih ƀuôn sang jing yuôm bhăn snăk, ară anei dŭm mta klei čiăng dưi ruh mgaih snăn brei dôk guôn hbĭl Hdră bhiăn dưi dưn yua hlăm hdĭp sa wưng êlâo kơh srăng dưi wĭt lač”.