VOV4.Êđê- Aguah mbrue (17/1), k’iăng khua bruă kƀĭn ala TrầnThanh Mẫn djă akŏ êpul khua bi ala bruă kƀĭn ala nao čuh brui mngưi, dưm kwang mnga bi hdơr kơ Đại tướng Võ Nguyên Giáp, lehanăn Khua gĭt gai Đảng êlâo dih Lê Duẩn ƀri wưng Tết nguyên đán Nhâm Dần 2022. K’iăng khua bruă kƀĭn ala Trần Thanh Mẫn mbĭt hŏng êpul bi ala mâo leh klei mpŭ ti anăp mnguh mngăt đại tướng Võ nguyên Giáp – jing ayŏng khua kơ lĭng kahan yang ƀuôn Việt Nam, jing khua kahan prŏng hing ang kơ djuê ana Việt Nam, bi hdơr kơ bruă prŏng prĭn ñu duh jih klei hdĭp ñu kơ bruă lăn čar kơ Đảng, lehanăn djuê ana Việt Nam. Hŏng lĭng kahan yang ƀuôn Việt Nam, ñu jing leh khua knơ̆ng kiă kriê prŏng, jing ayŏng khua kơ lĭng kahan, mâo leh lu bruă yuôm bhăn mkŏ mjing sa êpul lĭng kahan jhŏng ktang, ba wĭt leh klei dưi prŏng hlăm bruă bi blah kdơ̆ng hŏng Prăng lehanăn Mi plah ala./.

Pô mblang: Y-Ƀel Êban