VOV4.Êđê - Hŏng êbeh 10 thŭn nao hgŭm hlăm bruă êpul, amai Nông Thị Lành, k’iăng khua kiă kriê êpul bruă phung mniê ti ƀuôn Ograng (să Ia Pêč, kdriêk Ia Grai, čar Gia Lai) jing pô hur har hlăm bruă phung mniê, mâo lu klei đru mguôp hlăm alŭ wăl. Boh nik hŏng ai tiê thâo khăp, thâo pap, amai bi mguôp leh mnuih ƀuôn sang hlăm alŭ wăl, hrăm mbĭt đru kơ dŭm gŏ sang ƀun ƀin, gŏ sang mâo klei hdĭp dleh dlan.

Klei ruă Covid 19 truh ti ƀuôn Ogran ngă kơ lu gŏ sang dleh dlan ară anei hĭn mơh lŏ dleh dlan hĭn. Phạm Thị Lam jing sa hlăm dŭm gŏ sang mâo mnuih bi ktlah, luič hnư hrui wĭt lehanăn lŏ luič liê lu ênoh bi liê mkăn. Lam brei thâo, hlăm wưng dôk dleh dlan, gŏ sang ñu tŭ mă leh lu klei đru mơ̆ng amai Nông Thị Lành: “Ung kâo mâo klei ruă, phung anak nao mă bruă kbưi wĭt nao bi ktlah snăn dleh dlan êdi, hlăm gŏ sang kâo amâo mâo mnơ̆ng ƀơ̆ng huă, lŏ tĭng tla 1 êklăk 600 êbâo prăk lĕ. Snăn kâo lač hŏng phung anak guôn leh jih wưng bi ktlah kơh amĭ kâo prăk ba. Snăn myun mơh hlăk anăn mâo amai Lành đru mguôp prăk đru kơ gŏ sang kâo”.

Amâo djŏ knŏng đru kơ amai adei mniê hlăm êpul bruă mniê ƀuôn Ogran, amai Nông Thị Lành mbĭt hŏng amai adei mniê mkăn hlăm êpul lŏ đru kơ lu amai adei dleh dlan mkăn ti alŭ djiêu gah. Hlăm anăn, mâo gŏ sang amai Tạ Thị Hồng Hạnh ti ƀuôn Sát Tâu, să Ia Pêč. Pap kơ klei hdĭp ƀun knap mơ̆ng gŏ sang amai Hạnh mbĭt anăn hiu mdrao mgŭn nanao klei ruă kơ ung gơ̆, amai Nông Thị Lành iêu mthưr bi đru êbeh 4 êklăk prăk đru kơ amai Hạnh mâo prăk ba yua hlăm klei hdĭp. Leh ung Hạnh djiê kyua klei ruă ktrŏ, amai Lành nao đru mơh gŏ sang hlăm knăm dơr, kreh nao êmuh, mtrŭt mđĭ ai amai Hạnh gĭr hgao klei dleh dlan: “Dŭm mmông dleh dlan, amai Lành ăt mđup brei ƀung hdang krô, dŭm mta mnơ̆ng yua lehanăn mtrŭt mđĭ ai nanao, hlăm să mâo ya hdră đru, srăng ăt mđing kơ amai tal êlâo hĭn, iêu mthưr mnuih hlăm să đru čhum ao, ƀung hdang krô, braih. Amai Lành đru lu êdi yơh, lač jăk kơ amai lu lĭn kyua dŭm mmông dleh dlan snăn êpul bruă mniê lehanăn să hriê čuă, mđĭ ai nanao”.

Đĭ êdeh ph’phŭt hđăp, amai Nông Thị Lành đĭ hiu hlăm djăp ktuê êlan čiăng đru kơ phung hđeh điêt, mnuih mduôn khua mâo klei hdĭp dleh dlan. Ti tluôn klei hur har, jih ai tiê kơ bruă, ƀiă snăk mnuih thâo, amai Nông Thị Lành ăt dôk mdrao klei ruă, hŏng lu blư̆ xạ trị. Khădah pô ăt dleh dlan kyua dôk mâo klei ruă, ƀiădah amai Lành ăt hơ̆k m’ak, gĭr nao đru kơ lu mnuih adôk dleh dlan mkăn. “Amai čang hmăng grăp čô mnuih sa ai hŏng bruă ñu ngă. Sa hruê êdei, čang hmăng klei ruă anei srăng jih čiăng kơ mnuih ƀuôn sang lŏ wĭt hŏng klei h’ĭt ênang, mă bruă msĕ êlâo. Knŏng čang hmăng kơ pô suaih pral, jih jang mnuih ƀuôn sang suaih pral mơh, čang hmăng mâo lu phung mâo ai tiê kmah đru kơ bruă anei mơ̆ng pô, grăp blư̆ iêu mthưr klei bi mguôp đru kơ mnuih dleh dlan srăng mâo phŭn prăk đru kơ digơ̆”.

Hluê si Anôk bruă sang čư̆ êa să Ia Pêč, hlăm thŭn 2021, amai Nông Thị Lành bi hgŭm leh hŏng dŭm knơ̆ng, dhar bruă mđup brei dŭm êtuh hnư mnơ̆ng mâo mnơ̆ng yua aguah tlam, hdruôm hră kơ dŭm gŏ sang, phung hđeh ti dŭm să mâo klei hdĭp dleh dlan, phung hđeh êrĭt êrin ... Phạm Thị Kim Tuyến, K’iăng khua anôk bruă sang čư̆ êa să Ia Pêč tĭng dlăng: Amai Nông Thị Lành jing sa čô knuă druh gưl nah gŭ êdah êdi hlăm djăp mta bruă. Klei êdah êdi mơ̆ng amai Lành jing hur har, jih ai tiê kơ bruă nah gŭ “Hŏng klei đua klam mơ̆ng pô ti alŭ, ƀuôn, êngao kơ hdră mtô mblang, mtrŭt mjhar, đru brei, ƀuh klei găl nao bi ktlah mơ̆ng mnuih ƀuôn sang dleh dlan snăn ñu nao iêu mthưr klei đru. Să bi mni êdi kơ bruă ngă mơ̆ng ñu, mâo leh klei pah mni, mtrŭt mđĭ ai kơ Nông Thị Lành. Mbĭt anăn, Nông Thị Lành ăt jing gru mngač čiăng mtô mblang brei grăp čô ƀuh ai tiê đua klam mơ̆ng sa čô mnuih ƀuôn sang hlăm hdră gang mkhư̆ klei ruă tưp, boh nik jing hdră đru kơ mnuih knap mñai, đru kơ anôk bruă sang čư̆ êa alŭ wăl, đru kơ dŭm anôk bruă, ba akŏ hlăm djăp hdră bruă. Amai mâo klei đua klam, hur har kơ bruă lehanăn mâo lu anôk bruă akâo brei klei pah mni.

Hŏng dŭm boh tŭ dưi mâo, lu thŭn êgao, amai Nông Thị Lành mâo leh dŭm gưl bruă sang čư̆ êa alŭ wăl lehanăn êpul êya bruă mđup brei hră pah mni. Hŏng ai tiê mhač čhač, hơ̆k m’ak, jĕ giăm boh nik thâo khăp čiăng, bi đru kơ grăp čô mnuih, amai Nông Thị Lành mâo nanao mnuih ƀuôn sang mpŭ lehanăn khăp čiăng./.