K’iăng Khua Knŭk kna Bùi Thanh Sơn hmư̆ leh khua gĭt gai čar Cao Bằng hưn mdah kơ boh klei luč liê kyua yan adiê ngă, boh nik angĭn êbŭ mrô 3. Hlue anăn, klei yan adiê ngă mơ̆ng akŏ thŭn truh ară anei ngă kơ Cao Bằng luč liê êbeh 248 êklai prăk, hjăn angĭn êbŭ mrô 3 ngă kơ 45 čô djiê, 15 čô êka leh anăn 8 čô luč ka thâo ƀuh, giăm 1.500 boh sang, êbeh 1.600 ha djam tam luč rai.

K’iăng Khua knŭk kna, Khua phŭn bruă hŏng tač êngao Bùi Thanh Sơn mtă kơ čar Cao Bằng lŏ dơ̆ng mjêč duah phung luč ka thâo ƀuh, mbĭt anăn pral msir mgaih klei yan adiê ngă, boh nik klei bi ktlah kyua klưh hroh hlăm êlan klông ară anei. Brei alŭ wăl ngă jăk bruă đru mnơ̆ng ƀơ̆ng huă, êa doh, mnơ̆ng yua kơ mnuih ƀuôn sang ti krĭng klưh hroh leh anăn mnuih ƀuôn sang ti krĭng bi ktlah hjăn.