Hruê 25/9, ƀri gưl êpul bi ala gưl dlông Việt Nam kyua Khua gĭt gai Đảng, Khua ala čar Tô Lâm ngă khua nao hlăm Klei bi kƀĭn gưl dlông kơ êdei anăp, Klei bi kƀĭn prŏng Êpul hgŭm lu ala čar gưl 79, mă bruă ti Mi, K’iăng Khua knŭk kna, Khua phŭn bruă hŏng tač êngao Bùi Thanh Sơn mâo leh klei bi tuôm hŏng K’iăng Pô đru kcĕ răng mgang klei êđăp ênang ala čar Mi Jonathan Finer.

K’iăng Khua knŭk kna, Khua phŭn bruă hŏng tač êngao Bùi Thanh Sơn bi mklă Việt Nam dlăng Mi jing ƀĭng hgŭm yuôm bhăn leh anăn čang hmăng hŏng Mi lŏ dơ̆ng ba klei bi hgŭm dua ala čar êlam hĭn, tŭ dưn, hơĭt kjăp mơ̆ng tur knơ̆ng mpŭ, klei dưi leh anăn klei bhiăn bi hgŭm dua nah, ba klei tŭ dưn kơ mnuih ƀuôn sang dua ala čar leh anăn đru mguôp hlăm klei êđăp ênang, hơĭt kjăp, bi hgŭm leh anăn đĭ kyar ti krĭng wăl leh anăn dlông rŏng lăn.