K’iăng Khua knŭk kna Lê Minh Khái mñă klă: knŭk kna Việt Nam mâo nanao klei mtrŭt mjhar dŭm knơ̆ng bruă Dhŭng Korea duh bi liê mrâo leh anăn pŏk mlar hnơ̆ng duh bi liê, boh nik hlăm bruă mkŏ mkra, mkra mjing kdrăp pui kmlă mrâo mrang, mta bán dẫn, klei čih pioh, kdrăp sinh học, wăl krah thâo mĭn, kñăm kơ bruă ba jao kdrăp mrâo mrang.

Việt Nam yap yuôm bhăn bruă Dhŭng Korea lŏ dơ̆ng dlăng kơ Việt Nam jing ƀĭng hgŭm hdră êlan kơ ODA leh anăn dŭm hdră bi mguôp mđĭ kyar mơ̆ng Dhŭng Korea mkŏ mjing boh kdrŭt mđĭ kyar bruă duh mkra ala ƀuôn ti lu krĭng, alŭ wăl hlăm kluôm ala. K’iăng Khua knŭk kna mñă kơ Dhŭng Korea lŏ dơ̆ng pŏk mlar hĭn klei đru amâo lŏ wĭt mă hŏng Việt Nam, boh nik hlăm dŭm mta bruă ksiêm duah mđĭ kyar R&D, mlih mrâo hŏng klei mbruă…Hmăng hmưi k’iăng Khua knŭk kna hlŏng păn ngă Khua phŭn bruă ngăn prăk Dhŭng Korea Choo Kyung Ho lŏ dơ̆ng uêñ mĭn, gĭt gai dŭm anôk bruă Dhŭng Korea bi mguôp hŏng dŭm anôk bruă Việt Nam hluê ngă tŭ dưn dŭm klei bi klă hlăm klei kƀĭn blŭ hrăm tal 2 hlăm wưng kơ anăp.