VOV4.Êđê - Tlam mbruê 13/6, ti sang bruă knŭk kna, k’iăng Khua knŭk kna Lê Minh Khái, khua êpul gĭt gai bi hơĭt ênoh mnơ̆ng dhơ̆ng gĭt gai leh klei kƀĭn hŏng dŭm phŭn dhar bruă kơ bruă bi hơĭt ênoh mnơ̆ng yua mjêč. Blŭ hlăm klei kƀĭn, k’iăng Khua knŭk kna Lê Minh Khái mñă klă, hlăm 5 mlan akŏ thŭn, klei kpĭ prăk luč ênoh jing lu êdi. Phŭn agha kyua dưn yua dŭm hdră ngă prăk bi êdu. Êngao kơnăn, leh klei ruă tưp Covid-19 dưi ksiêm dlăng, bruă mkra mjing, mnia mblei dưi mkŏ wĭt, klei čiăng ba yua đĭ ktang. Hlăm wưng anăn, knŭk kna, Khua knŭk kna leh anăn dŭm phŭn, dhar bruă, alŭ wăl hluê ngă leh lu hdră êlan mâo boh tŭ dưn. Mñă klă hlăm hruê mmông anăp, klei kpĭ bruă prăk luč ênoh srăng lŏ đĭ hĭn.

Boh nik jing ênoh êa săng, êa pui đĭ nao dơ̆ng hmăi amâo mâo jăk kơ ênoh lu mta bruă, mnơ̆ng dhơ̆ng. Kyuanăn, bruă bi hơĭt ênoh mơ̆ng knŭk kna mơ̆ng ară anei truh kơ jih thŭn jing dleh dlan êdi. Bi hŏng bruă ksiêm dlăng ênoh mnơ̆ng dhơ̆ng amâo dưi kƀah hŏng klei hdĭp mnuih ƀuôn sang, k’iăng Khua knŭk kna mtă kơ dŭm phŭn, dhar bruă mơ̆ng ară anei truh kơ jih thŭn, srăng ktuê dlăng kjăp boh sĭt anôk mnia mblei, mđĭ hĭn bruă đăo knăl hnưm, čiăng mâo dŭm hdră êlan hŏng klei mbruă, rơ̆ng mkăp brei mnơ̆ng dhơ̆ng yua hlăm bruă mkra mjing, blei ba yua, djŏ hŏng hdră kčah mâo leh.

Y-Ƀel pô mblang