K’iăng Khua knŭk kna Lê Minh Khái mñă klă, bruă kriê dlăng ênoh ênil akŏ thŭn tŭ lu klei kpĭ mơ̆ng lu mta. Boh sĭt bruă duh mkra tar rŏng lăn adôk dleh dlan, dleh đăo knăl. Klei prăk luč ênoh hrŏ ƀiădah ăt dôk ti hnơ̆ng lu. Hlăm lăn čar, ênoh ênil tŭ lu klei kpĭ, ƀiădah ăt djŏ hŏng hdră kčah. Grăp thŭn hluê si hdră bhiăn, dŭm mlan akŏ thŭn đĭ leh anăn hrŏ ƀrư̆ ƀrư̆ ti mlan 4, mlan 5/2024.

Khădah sơnăn, Khua êpul gĭt gai kriê dlăng ênoh mñă kơ dŭm Phŭn, dhar bruă, alŭ wăl amâo mâo luč klei răng, ngă ngơi mang hlăm klei gĭt gai. Čiăng čŏng bi mdrơ̆ng hŏng dŭm klei lông dlăng hlăm bruă kriê dlăng ênoh ênil hlăm dŭm mlan adôk mơ̆ng thŭn 2024, k’iăng Khua knŭk kna Lê Minh Khái mñă kơ dŭm Phŭn, dhar bruă, alŭ wăl čŏng mtrŭt mđĭ hluê ngă dŭm hdră êlan mơ̆ng knŭk kna, Khua knŭk kna hlăm dŭm hră mtrŭn, mkŏ mjing klei găl gĭt gai leh anăn klei blŭ mguôp mơ̆ng k’iăng Khua knŭk kna hlăm dŭm klei hưn mdah hlăm klei kƀĭn grăp tuôr.