Blŭ hlăm mmông mă bruă, k’iăng Khua knŭk kna Lê Minh Khái yap yuôm bhăn dŭm boh tŭ dưn mơ̆ng bruă kđi čar Tây Ninh dưi mâo leh hlăm wưng êgao, mtă kơ khua gĭt gai čar Tây Ninh hlăk mblang, bi klă boh sĭt čiăng mâo dŭm hdră êlan mđĭ kyar bruă duh mkra ala ƀuôn. K’iăng Khua knŭk kna mtă hlăm wưng kơ anăp, Tây Ninh čiăng čŏng pô thâo klă boh sĭt, mđĭ hnơ̆ng klei đăo knăl dŭm klei hmăi kơ klei đĭ kyar alŭ wăl.

Čar mkŏ mjing klei sa ai, bi mguôp čiăng mgaih msir dŭm boh klei hlăm klei dưi, hluê ngă tŭ dưn, hrăm mbĭt dŭm bruă klam, hdră êlan mđĭ kyar bruă duh mkra ala ƀuôn. Êngao kơnăn, Tây Ninh čiăng lŏ mtrŭt mđĭ bruă mkŏ wĭt bruă tuh tia, mđing truh ruh mgaih dŭm klei dleh dlan čiăng iêo jak klei duh bi liê, mđĭ kyar hŏng êlan mbĭt leh anăn ba yua dŭm klei găl, klei ktang mơ̆ng čar.