VOV4.Êđê- Ti anôk bruă knŭk kna, k’iăng khua knŭk kna lê Văn Thành kiă kriê leh klei bi kƀĭn online Êpul khua kiă kriê mơ̆ng knŭk kna kơ bruă mkra êlan dơ̆ng pral Dưr – Dhŭng tĭng kơ nah Ngŏ. Klah čŭn klei bi kƀĭn, k’iăng khua knŭk kna Lê Văn Thành lač: Hdră mtrŭn klei bi kƀĭn prŏng Đảng 13 mâo leh mta kñăm truh kơ thŭn 2025, srăng bi leh truh 2 êbâo km êlan dơ̆ng pral.

Čiăng mâo ngă bruă anei, Bruă kƀĭn ala mâo leh hdră mtrŭn hŏng lu hdră êlan mă bruă mdê mdê, mjing djăp klei găl pioh kơ bruă mkra êlan hŏng klei jăk. K’iăng khua knŭk kna lač, truh thŭn 2025 mâo bi leh bruă mkra thiăm truh 2 êbâo km êlan djŏ hŏng hdră. K’iăng khua knŭk kna mtă kơ phŭn bruă êlan klông dŭ mdiăng pral ngă djăp mta bruă kñăm ruah pô ngă bruă, mkra mtam 729km êlâo kơ hrue 31/12. Mă bruă pral hŏng dŭm alŭ wăl, boh nik kơ bruă ruh mgaih anôk ala, mkăp pral prăk ngă bruă čiăng truh kơ hrue 31/12 mâo ruh mgaih jih 70% anôk ala pioh mkra êlan./.

Pô mblang: Y-Khem Niê