VOV4.Êđê- Hrue mbrue (6/4), ti anôk bruă knŭk kna, k’iăng khua knŭk kna Lê Văn Thành mâo leh klei bi kƀĭn online Êpul khua kiă kriê bruă ala čar rŭ mkra tač êdeh phiơr Long Thành. Tui si klei hâo mdah mơ̆ng pô duh bi liê, leh bi ruĕ bruă hrŏng ruah pô ngă bruă, lehanăn mâo klei kuôl kă hrue 16/3/2022, Knơ̆ng bruă tač êdeh phiơr Việt Nam (ACV) mkŏ mjing leh klei mphŭn trŭn kơ dŭm bruă ngă tal êlâo pơ̆ng gơ̆ng mkra atur sang mă bruă ti tač êdeh phiơr. leh êbeh sa mlan mă bruă, bruă čuk hli anôk ala mâo bi leh lehanăn dŭm anôk lông ktar ƀăng gơ̆ng, truh jih mlan 3 dưi mâo leh truh 2 êklăk 500 êbâo m³ lăn boh tâo kuai, jing kdlưn hĭn truh 500 êbâo m³ mkă hŏng hdră kčah. Klei kơ prăk duh bi liê truh kơ ară anei knơ̆ng bruă tač êdeh phiơr ACV mâo mprăp leh truh 36 êbâo êklai prăk tal êlâo mkăp kơ bruă rŭ mkra. Ti anôk bi kƀĭn, phung bi ala lač, bruă ruh mgaih anôk ala, ba jao anôk ala wưng leh êgao mâo leh klei bi mlih, ƀiădah ăt êmưt mkă hŏng hdra kčah ba klei ktrŏ kơ bruă rŭ mkra. K'iăng khua knŭk kna Lê Văn Thành mñă mta kñăm: Ngă bi dưi, bi leh bruă mkra tač êdeh phiơr hlăm thŭn 2025; hŏng hnơ̆ng kjăp jing mrô sa, mbĭt hŏng anăn mđing nanao kơ bruă bi kdơ̆ng hŏng klei bi liê pliă plia, luič liê ti mang, ngă klei amâo mâo djŏ êjai rŭ mkra./.

Pô mblang: Y-Khem Niê