VOV4.Êđê -  Tlam 25/9, K’iăng Khua knŭk kna Lê Văn Thành gĭt gai leh klei bi kƀĭn online pŏk ngă hdră mdrơ̆ng hŏng angĭn êbŭ Nô ru. Hlue si Trần Hồng Thái, Khua Knơ̆ng bruă đăo knăl yan adiê, angĭn êbŭ Nô Ru dôk mŭt hlăm Êa ksĭ Ngŏ leh anăn srăng jing angĭn êbŭ mrô 4 hlăm thŭn anei. Anei jing gưl angĭn êbŭ ktang hĭn hlăm wang 20 thŭn hŏng anei hmăi kơ krĭng kwar Krah. Blŭ hrăm hlăm klei bi kƀĭn, K’iăng Khua knŭk kna Lê Văn Thành mtă kơ dŭm phŭn, dhar bruă, alŭ wăl mđing mkŏ mjing mbĕ đuê̆ mnuih ƀuôn sang, iêô mthưr hô̆ pui, hô̆ mram wĭt kơ anôk êđăp ênang hŏng klei thâo răng. Phŭn bruă lĭng kahan, Phŭn bruă êlan klông dŭ mdiăng bi hgŭm hŏng dŭm alŭ wăl ktuê dlăng ba hô̆ mran, hô̆ pui hlăm êa ksĭ wĭt anôk kđap êđăp ênang, rơ̆ng êđăp ênang kơ mnuih ƀuôn sang, ñĕ kơ klei hô̆ pui, hô̆ mran wĭt kđap ƀiădah ăt luič liê./.

Dôk ti krĭng nah Dưr alŭ wăl Lăn Dap Kngư, čar Kontum đăo knăl srăng hmăi ktang mơ̆ng angĭn êbŭ Noru. Čiăng mdrơ̆ng hŏng klei amâo mâo jăk mơ̆ng angĭn êbŭ, knơ̆ng bruă sang čư̆ êa čar mâo leh asăp mtrŭn mta kơ jih jang bruă sang čư̆ êa djăp alŭ wăl, dhar bruă djŏ tuôm, boh nik dŭm êpul bruă kiă kriê knơ̆ng mbông êa, phŭn pui mâo hdră mdrơ̆ng. Hlue anăn, khua knơ̆ng bruă sang čư̆ êa čar Kontum Lê Ngọc Tuấn mtă kơ knơ̆ng bruă sang čư̆ êa dŭm kdriêk, ƀuôn prŏng lehanăn dŭm knơ̆ng dhar bruă mâo bruă nga bi djŏ, kăp ksiêm êlan angĭn êbŭ hriê, mtă kơ jih jang mnuih čŏng mâo hdră êlan răng kơ pô, ksiêm dlăng jih jang alŭ wăl ktue hang krông, djiêo ênao êa, phŭn pui, dŭm krĭng tlung, anôk ênưih klưh hroh lăn, čiăng mbĕ hĕ mtam phung ƀuôn sang huĭdah mâo klei amâo mâo jăk truh./.

Y-Khem; H’ Zawut pô mblang