VOV4.Êđê - Ti anôk bruă knŭk kna, k’iăng Khua knŭk kna Lê Văn Thành gĭt gai leh klei kƀĭn Êpul gơ̆ng bi klă hdră čuăl mkă êa jua wưng thŭn 2021 – 2030, tă hdră truh ti thŭn 2050. Anei jing hdră čuăl mkă ala čar tal êlâo dưi mkŏ mjing hlăm bruă êa jua, jing hdră tă kluôm kơ dŭm hdră čuăl mkă ala čar, čuăl mkă krĭng, čuăl mkă čar, čuăl mkă krĭng dap mnai êa krông leh anăn dŭm hdră čuăl mkă djŏ tuôm hlăm bruă ba yua êa. Bi klă hlăm klei kƀĭn, k’iăng Khua knŭk kna Lê Văn Thành yap yuôm bhăn klei gĭr mơ̆ng phŭn bruă ngăn dŏ leh anăn wăl hdĭp mda hlăm bruă gĭt gai, bi mguôp hŏng dŭm phŭn, dhar bruă, alŭ wăl, dŭm anôk bruă, êpul êya, phung thơ̆ng kơ bruă, phung kreh knhâo čiăng mkŏ mjing hdră čuăl mkă mâo hnơ̆ng tŭ jăk, djŏ hŏng klei bhiăn ala čar. K’iăng Khua knŭk kna mtă kơ phŭn bruă ngăn dŏ leh anăn wăl hdĭp mda lŏ dơ̆ng mđing hmư̆ klei blŭ, bi leh kluôm ênŭm, akâo klei blŭ mơ̆ng phung hgŭm êlâo kơ hưn mdah hŏng gưl bruă nah dlông čiăng bi klă.

Y-Ƀel pô mblang