VOV4.Êđê- Tlam mbruê 11/2, k’iăng Khua knŭk kna Lê Văn Thành bi kƀĭn leh hŏng dŭm phŭn, dhar bruă leh anăn alŭ wăl kơ klei mprăp duh bi liê mkra êlan dơ̆ng pral hlăm wưng thŭn 2021 -2025. Hluê si phŭn bruă êlan klông leh anăn dŭ mdiăng hưn, hlăm 5 mta bruă yuôm bhăn mơ̆ng ala čar mâo 3 mta bruă mơ̆ng phŭn bruă êlan klông leh anăn dŭ mdiăng gĭt gai mâo: Êlan dơ̆ng pral Khánh Hoà – Vũng Tàu, Êlan dơ̆ng pral Châu Đốc – Cần Thơ – Sóc Trăng leh anăn Êlan dơ̆ng pral Khánh Hoà – Ƀuôn Ama Thuôt leh anăn 2 mta bruă mơ̆ng alŭ wăl gĭt gai jing: Êlan dar 4 alŭ wăl ƀuôn prŏng Hà Nội leh anăn êlan dar ƀuôn prŏng Hồ Chí Minh mbĭt hŏng 4 hdră mkăp êpul A. Bi klă hlăm klei kƀĭn, k’iăng Khua knŭk kna lač klă, mđĭ kyar êlan dơ̆ng pral srăng mkŏ mjing boh kdrŭt kơ klei đĭ kyar bruă duh mkra ala ƀuôn kơ jih jang alŭ wăl mâo êlan dơ̆ng pral găn nao. Tơdah dưi mkŏ mjing hnưm, boh nik jing bruă ruh mgaih anôk ala srăng bi hrŏ ênoh prăl lu hĭn. K’iăng Khua knŭk kna brei thâo, knŭk kna mâo leh klei bi klă mơ̆ng ară anei truh kơ thŭn 2025 kñăm tal êlâo hĭn ai dưi čiăng mkra êlan dơ̆ng pral.

Pô mblang: Y-Ƀel Êban