Hrue 12/10, ti Đà Lạt, Klei bi kƀĭn iêo jak klei duh bi liê čar Lâm Đồng thŭn  2025 pŏk leh, mâo k’iăng khua knŭk kna Nguyễn Hòa Bình, phung khua kiă kriê dŭm dŭm phŭn dhar bruă, lehanăn giăm 750 čô phung bi ala, phung duh bi liê hlăm ala čar lehanăn mơ̆ng ala tač êngao nao bi kƀĭn.

K’iăng khua knŭk kna Nguyễn Hòa Bình bi mni kơ klei gĭt ktĭr mơ̆ng Lâm Đồng – jing krĭng lăn mâo lu klei găl hlăm čư̆ čhiăng, dliê lehanăn êa ksĭ, bi êdah leh truh 132 mta bruă mâo klei iêo jak duh bi liê thŭn 2025 lehanăn 358 mta bruă kơ wưng thŭn 2026–2030. Knŭk kna ƀuăn mđrăm mbĭt hŏng čar   Lâm Đồng bi mklă 4 mta bruă prŏng: Bi leh klei bhiăn, mđĭ anôk duh bi liê, mđing kơ bruă nah gŭ, ba yua klei bhiăn pioh hjăn kơ čar kñăm mđĭ kyar kjăp, mđĭ kyar mrô, lehanăn mtah. K’iăng khua knŭk kna mtă kơ čar ruh mgaih jih klei dleh dlan, boh nik hlăm bruă ruh mgaih anôk ala, pŏk êlan kơ klei duh bi liê hŏng klei pral djăp mta bruă./.