VOV4.Êđê- Hlăm jar gưl nao chưn leh anăn mă bruă ti Việt Nam, tlam 23/1, ti Anôk bruă knŭk kna, K’iăng Khua Knŭk kna Phạm Bình Minh drông leh  John Kerry -Khua bi ala Khua mil čhil Mi. Ti mmông drông, K’iăng Khua knŭk kna Phạm Bình Minh bi êdah klei mơak ti anăp klei đĭ kyar mrâo hlăm klei bi hgŭm kluôm Việt Nam - Mi hlăm djăp mta bruă, hlăm anăn prăk bruă mnia blei dua ala čar thŭn 2021 mâo 111 êklai USD. K’iăng Khua knŭk kna bi mni leh anăn bi mni lač jăk kơ klei gĭr ktưn leh anăn đru mguôp mơ̆ng John Kerry hlăm hdră bi hgŭm leh anăn mđĭ klei bi hgŭm Việt Nam - Mi hlăm dŭm thŭn êgao, mơ̆ng tur knơ̆ng mâo leh, mtă kơ dua ala čar lŏ dơ̆ng mđĭ ktang klei bi hgŭm kñăm đĭ kyar hơĭt kjăp, boh sĭt leh anăn tŭ dưn. Ƀri gưl anei, K’iăng Khua knŭk kna ăt bi mni lač jăk kơ Knŭk kna Mi truh ară anei đru leh Việt Nam jih jang 29 êklăk 1 êtuh êbâo vaccin Covid-19, bi êdah klei čang hmăng Mi lŏ dơ̆ng mđing đru kơ Việt Nam hlăm dŭm mta bruă msĕ si sang hră - mtô bi hriăm , mdrao mgŭn, đru kơ mnuih knap mñai, bruă duh mkra mrô…

Pô mblang: H’Zawut Ƀuôn Yă