VOV4.Êđê -  Aguah hruê 17/3, ti Anôk bruă knŭk kna, Khua hlăm Phŭn bruă kđi čar, K’iăng khua knŭk kna Phạm Bình Minh gĭt gai leh Klei bi kƀĭn online čiăng hmư̆ dŭm Phŭn, anôk bruă hưn mthâo kơ hdră hluê ngă dŭm mta kñăm ala čar wưng thŭn 2021-2025 mâo Khua knŭk kna bi mklă jing Hdră ala čar kñăm mđĭ kyar bruă duh mkra – ala ƀuôn krĭng mnuih ƀuôn sang djuê ƀiă lehanăn krĭng čư̆ čhiăng; Hdră ala čar kñăm bi hrŏ ƀunh’ĭt kjăp lehanăn Hdră ala čar kñăm mkŏ mkra krĭng ƀuôn sang mrâo.

Klah čŭn ti anôk bi kƀĭn, K’iăng khua knŭk kna Phạm Bình Minh mtă, Dhar bruă Djuê ana, Phŭn bruă Mnuih ngă bruă – kahan êka êkeh lehanăn yang ƀuôn; Phŭn bruă Lŏ hma mđĭ kyar krĭng ƀuôn sang mjêč ngă leh dŭm klei găl, hnơ̆ng čuăn hlăm mlan 3 čiăng ba mdah kơ Dhar bruă gĭt gai anôk bruă kƀĭn ala hlăm bruă mkăp ngăn prăk kơ dŭm hdră kñăm ala čar. K’iăng khua knŭk kna lač klă, bruă hnưm mprăp dŭm klei găl djŏ hdră bhiăn jing čiăng êdi čiăng pŏk hluê ngă tŭ dưn dŭm mta kñăm ala čar hlăm wưng ti anăp./.

H’Nêc pô mblang